Monday, May 29, 2017

जिल्ह्यात जमावबंदी, शस्त्रबंदी आदेश लागू
नांदेड, दि. 29  :- जिल्ह्यात शनिवार 10 जून 2017  रोजी मध्यरात्रीपर्यत शस्त्रबंदी व जमावबंदी आदेश लागू केला आहे, अशी माहिती अपर जिल्हादंडाधिकारी कार्यालयाकडून देण्यात आली आहे.
आगामी काळातील निवडणुका, राष्ट्रीय सण, उत्सव आणि इतर सार्वजनिक कार्यक्रम, विविध प्रकारची संभाव्य आंदोलनाची शक्यता यांच्‍या पार्श्वभुमीवर जिल्ह्यात शांतता व सुव्यवस्था कायम रहावी म्हणून अपर जिल्हादंडाधिकारी यांनी मुंबई पोलीस अधिनियम 1951 चे कलम 37 (1) व (3) अन्वये जिल्ह्यात रविवार 28 मे ते शनिवार 10 जून 2017 रोजीच्‍या मध्यरात्रीपर्यत शस्त्रबंदी व जमावबंदी आदेश लागू केला आहे. त्यानुसार पाच किंवा पाचपेक्षा अधिक व्यक्तींनी या आदेशात नमूद असलेली कृत्ये सार्वजनिक परिसर किंवा त्याच्या जवळपास करण्यास बंदी घालण्यात आली आहे. हा आदेश पोलीस अधिकारी, शासकीय कर्मचारी, विवाह, अंत्ययात्रा, धार्मिक कार्यक्रम, यात्रा व इतर सक्षम अधिकारी यांनी विशेषरित्या परवानगी दिलेल्या मिरवणुकांना लागू होणार नाही.

000000
महात्मा गांधी तंटामुक्त गाव मोहीम
पत्रकारिता पुरस्कारासाठी प्रवेशिका पाठविण्याचे आवाहन
                नांदेड,  दि. 29 :- महात्मा  गांधी  तंटामुक्त  गाव  मोहिमेअतंर्गत  मोहिमेला  वस्तुनिष्ठ  प्रसिध्दी  देऊन ही  योजना  जनसामान्यांपर्यंत  प्रभावीपणे  पोहोचविणाऱ्या  पत्रकारांसाठी  शासनाने  जिल्हाविभाग  व  राज्य  स्तरावर  पुरस्कार  देण्याची  योजना  जाहीर केली आहे. नांदेड जिल्ह्यातील पत्रकारांनी या पुरस्कारासाठी  आपल्या  प्रवेशिका  गुरुवार 15 जून 2017 पर्यंत पाठवाव्यात , असे आवाहन महात्मा गांधी तंटामुक्त  गाव  मोहीम  पत्रकार  पुरस्कार  जिल्हास्तरीय  समितीच्यावतीने  करण्यात  आले  आहे. 
            जिल्हास्तरीय  प्रथम  पुरस्कार  रुपये  25 हजार, द्वितीय पुरस्कार रुपये 15 हजार आणि तृतीय पुरस्कार रुपये 10 हजार आहे. महात्मा गांधी तंटामुक्त गाव मोहिमेच्या प्रसिध्दीसाठी 2 मे 2016 ते 1 मे 2017 या कालावधीमध्ये प्रसिध्द केलेले लिखाण पुरस्कार पात्रतेकरिता मल्यमापनासाठी ग्राह्य धरण्यात येईल. नमूद कालावधीत वृत्तपत्रे / नियतकालिके यामधून प्रसिध्द झालेले टीकात्मक लेख, वृत्तांकन, बातम्या, अग्रलेख, फोटोफिचर्स अशा साहित्याचा विचार करण्यात येईल. पुरस्कारासाठी वृत्तपत्रांचे बातमीदार, स्तभंलेखक, मुक्तपत्रकार  पात्र  असतील.  पारितोषिकांसाठी  मराठी, हिंदी, इंग्रजी भाषेत प्रसिध्द केलेल्या साहित्याचा विचार करण्यात येईल. माहिती व जनसंपर्क महासंचालनालय, महाराष्ट्र राज्य, मुंबई यांच्यामार्फत प्रसिध्द करण्यात आलेल्या  अ, , क  वर्गवारीतील  वृत्तपत्रे / नियतकालिके  यामधून  प्रसिध्द झालेल्या साहित्याचाच  या  पारितोषिकांसाठी  विचार  करण्यात  येईल.
         एका वर्तमानपत्राच्या  प्रत्येक आवृत्तीतील एकाच पत्रकाराचा अर्ज संपादकामार्फत स्वीकारण्यात येईल.  जिल्ह्यातून  प्रथम  क्रमांक  मिळविलेल्या  पत्रकारांचे  विभागीय  स्तरावरील  पुरस्कारासाठी  आपोआप नामनिर्देशन होईल तर विभागातून प्रथम क्रमांक मिळविलेल्या पत्रकारांचे राज्य स्तरावरील पुरस्कारासाठी आपोआप नामनिर्देशन  होईल. 
नांदेड जिल्ह्यातील पत्रकारांनी आपल्या प्रवेशिका जिल्हा माहिती अधिकारी तथा सदस्य सचिव, महात्मा गांधी तंटामुक्त गाव मोहीम पत्रकार पुरस्कार जिल्हास्तरीय समिती, विसावानगर, नांदेड-431602 (दूरध्वनी क्र. 02462-250137)  यांचेकडे  गुरुवार 15 जून  2017  पर्यंत  पाठवाव्यात.
0000000

Friday, May 26, 2017

लोकसेवा आयोगाच्या परीक्षांसाठी
कडक उपाय योजनांचा अवलंब
नांदेड, दि. 26 :-  महाराष्ट्र लोकसेवा आयोगाच्यावतीने घेण्यात येणारी दुय्यम निरीक्षक पदासाठीची पूर्व परीक्षा रविवार 28 मे 2017 रोजी होणार आहे. या परीक्षेच्या अनुषंगाने गैरप्रकारांना प्रतिबंध करण्यासाठी आयोगाने कडक उपाय योजना केल्याचे जिल्हा प्रशासनाच्यावतीने कळविण्यात आले आहे.
रविवार 28 मे रोजी  सकाळी 10.30 ते दुपारी 12 यावेळेत परीक्षा होणार आहेत. या परीक्षेच्या पर्यवेक्षणावर जिल्हाधिकारी लक्ष ठेवणार आहेत. याशिवाय परीक्षेच्या पर्यवेक्षणासाठी आयोगाचे अधिकारी केंद्रावर उपस्थित राहणार आहेत. तसेच विशेष निरीक्षक, भरारी पथकाची नियुक्ती करण्यात आली आहे. परीक्षा केंद्रावर उमेदवारांना प्रवेश देताना पोलीस कर्मचाऱ्यांकडून तपासणी करण्यात येणार आहे. परीक्षेत गैर प्रकार केल्यास संबंधितावर फौजदारी व प्रशासकीय अशा दोन्ही स्वरुपाच्या कारवाई केल्या जाणार असल्याचेही आयोगाच्या प्रसिद्धी पत्रकात म्हटले आहे.

000000
औषध दुकान बंदच्या अनुषंगाने
अन्न व औषध प्रशासनाचे आवाहन
नांदेड, दि. 26 :-  औषध दुकानदारांच्या मंगळवार 30 मे 2017 रोजीच्या देशव्यापी संपात जिल्ह्यातील औषध दुकानदार सहभागी होण्याची शक्यता असल्याने अन्न व औषध प्रशासन विभागाने रुग्ण, रुग्णाचे नातेवाईक, औषध दुकानदार तसेच वैद्यकीय घटकांना आवाहन केले आहे.
या आवाहनात सहाय्यक आयुक्त यांनी म्हटले आहे की, मंगळवार 30 मे रोजीच्या संपात जिल्ह्यातील औषध दुकानदारांनी सहभागी होवू नये. व्यवसाय करताना अर्थप्राप्ती तसेच जनसामान्यांच्या आरोग्य सेवेचे समाजोपयोगी कार्य घडत आहे. अनेक औषध दुकानदार रात्री, अपरात्री आपत्कालीन परिस्थितीत औषधी दुकान उघडून सेवा प्रदान करतात. अशा प्रकारची सेवा जनसामान्यांना देण्याचे कार्य आपल्याकडून अवितरीतपणे सुरु राहावी. त्यामुळे प्रस्तावीत आंदोलनात सहभागी होवू नये जेणेकरुन जनतेची गैरसोय व रुग्णांना त्रास होणार नाही.  
सरकारी, निमसरकारी व खाजगी दवाखान्यांनी रुग्णांची गैरसोय होवू नये यासाठी औषधांचा मुबलक साठा करुन ठेवावा. तसेच नागरिकांनी या बंद काळात औषधांचा पुरवठा करण्यास औषध दुकानदारांनी नकार दिल्यास त्याबाबत संपर्क साधावा. संपर्कासाठी पत्ता व दुरध्वनी क्रमांक असे, सहाय्यक आयुक्त अन्न व औषध प्रशासन मध्यवर्ती प्रशासकीय इमारत नांदेड (दुरध्वनी क्र. 02462-251360).

0000000
औषध दुकान बंदच्या अनुषंगाने
अन्न व औषध प्रशासनाचे आवाहन
नांदेड, दि. 26 :-  औषध दुकानदारांच्या मंगळवार 30 मे 2017 रोजीच्या देशव्यापी संपात जिल्ह्यातील औषध दुकानदार सहभागी होण्याची शक्यता असल्याने अन्न व औषध प्रशासन विभागाने रुग्ण, रुग्णाचे नातेवाईक, औषध दुकानदार तसेच वैद्यकीय घटकांना आवाहन केले आहे.
या आवाहनात सहाय्यक आयुक्त यांनी म्हटले आहे की, मंगळवार 30 मे रोजीच्या संपात जिल्ह्यातील औषध दुकानदारांनी सहभागी होवू नये. व्यवसाय करताना अर्थप्राप्ती तसेच जनसामान्यांच्या आरोग्य सेवेचे समाजोपयोगी कार्य घडत आहे. अनेक औषध दुकानदार रात्री, अपरात्री आपत्कालीन परिस्थितीत औषधी दुकान उघडून सेवा प्रदान करतात. अशा प्रकारची सेवा जनसामान्यांना देण्याचे कार्य आपल्याकडून अवितरीतपणे सुरु राहावी. त्यामुळे प्रस्तावीत आंदोलनात सहभागी होवू नये जेणेकरुन जनतेची गैरसोय व रुग्णांना त्रास होणार नाही.  
सरकारी, निमसरकारी व खाजगी दवाखान्यांनी रुग्णांची गैरसोय होवू नये यासाठी औषधांचा मुबलक साठा करुन ठेवावा. तसेच नागरिकांनी या बंद काळात औषधांचा पुरवठा करण्यास औषध दुकानदारांनी नकार दिल्यास त्याबाबत संपर्क साधावा. संपर्कासाठी पत्ता व दुरध्वनी क्रमांक असे, सहाय्यक आयुक्त अन्न व औषध प्रशासन मध्यवर्ती प्रशासकीय इमारत नांदेड (दुरध्वनी क्र. 02462-251360).

0000000
खरीपासाठी बियाणे, खते, औषध खरेदी
करताना शेतकऱ्यांनी काळजी घ्यावी - कृषि विभाग
नांदेड, दि. 26 :-  खरीप हंगाम 2017 मध्ये बियाणे, रासायनिक खते, किटकनाशक औषध खरेदी करताना शेतकऱ्यांनी काळजी घ्यावी असे आवाहन असे आवाहन जिल्हा परिषदेचे कृषि विकास अधिकारी पंडीत मोरे यांनी केले आहे.
शेतकऱ्यांनी  गुणवत्ता दर्जाची हमी देणाऱ्या अधिकृत विक्रेत्याकडूनच खरेदीस प्राधान्य दया. बनावट, भेसळयुक्त बियाणे, खते, किटकनाशके खरेदी टाळण्यासाठी अधिकृत विक्रेत्यांकडून पक्या पावतीसह खरेदी करा. पावतीवर शेतकऱ्याची विक्रेत्याची स्वाक्षरी मोबाईल नंबरची नोंद करुन पिक निघेपर्यंत पावती संभाळून ठेवा. खरेदी केलेल्या बियाणेचे वेष्टन / पिशवी, टॅग, खरेदीची पावती त्यातील थोडे बियाणे पिकाची कापणी होईपर्यंत जपून ठेवावे. भेसळीची शंका दूर करण्यासाठी बियाणेची पॉकिटे सिलबंद/ मोहोरबंद असल्याची खात्री करा. बियाणे उगवणीच्या खात्रीसाठी पॉकिटावरची अंतीम मुद्दत पाहून घ्या. कमी वजनाच्या निविष्ठा तसेच छापील किंमतीपेक्षा जास्त किंमतीने विक्री अथवा इतर तक्रारीसाठी जवळच्या कृषि विभागाच्या कर्मचाऱ्यांशी संपर्क साधा. किटकनाशके अंतीम मुदतीचे आतील असल्याची खात्री करावी. आपल्या तक्रारी विषयी माहिती प्रत्यक्ष, दुरध्वनी, ई-मेल, एस.एम.एस. इत्यादीद्वारे देवून शासनाच्या गतीमान गुणनियंत्रण अभियानात सहभागी व्हावे. कृषि निविष्ठांविषयी असलेल्या अडचणी, तक्रारी सोडविण्यासाठी मार्गदर्शनासाठी कृषि विभागाच्या टोल फ्री क्रमांक 1800 233 4000 वर संपर्क साधावा.  विक्री केंद्रावर भरारी पथकाचे फोन नंबर दिलेले आहेत. अडचणी सोडविण्यासाठी फोनवर संपर्क साधा. गुरुवार 1 जून 2017 पासून डीबीटीद्वारे रासायनिक खताची विक्री करण्यात येणार आहे. खत खरेदी करताना आधारकार्ड आवश्यक आहे. आधारकार्ड नंबर देऊनच खताची खरेदी करावी असेही आवाहन कृषि कार्यालयाकडून करण्यात आले आहे.

00000
 चला गावाकडे जा-ध्‍यास विकासाचा घे
अभियानास नांदेड तालुक्यात धनगरवाडीतून प्रारंभ
नांदेड, दि. 26 :-  औरंगाबाद विभागाचे विभागीय आयुक्‍त डॉ. पुरुषोत्तम भापकर यांच्या संकल्‍पनेतशनिवार 20 ते सोमवार 29 मे 2017 या कालावधीत चला गावाकडे जा-ध्‍यास विकासाचा घे या अभियानाची सुरुवात झाली आहे. त्याअनुषंगाने नांदेडचे तहसिलदार किरण अंबेकर यांनी नांदेड तालक्‍यातील धनगरवाडी या गावी हे अभियान राबविले आहे.
श्रमदानाचे काम करुन या गावात एक दिवस मुक्‍काम केला. तेथील नागरीकांशी चर्चा करुन त्‍यांच्‍या डीअडचणी जाणुन घेतल्‍या व त्‍यांचे निरसण केले. पाणी टंचाई संदर्भात गावातील विहिरींची माहिती घेण्‍यात आली. एक नविन विंधन विहीर घेण्‍यास सांगण्‍यात आले. प्राधान्‍य कुटूंब लाभार्थी कमी असून बीपीएलचा एकही लाभार्थी या गावात नसल्‍यामुळे त्‍यांना या योजनेबाबत जागृत करुन लाभार्थी संख्‍या वाढविण्‍यासाठी सांगण्‍यात आले.
समृध्‍द महाराष्‍ट्र जनकल्‍याण योजनेमधील 11 कलमी कार्यक्रमाचे योजनानिहाय सर्व नागरीकांना मार्गदर्शन करण्‍यात आले. सिंचन विहीरीचे 2 लाभार्थी निवडण्‍यात आले. व्‍हर्मी कंपोस्‍टींग, नाडेफची कामे घेण्‍यास प्रोत्‍साह देण्‍यात आले. तर जिल्‍हा रेशीम विभागाच्‍यावतीने रेशीम कामासाठी 10 लाभार्थी निवडण्‍यात आले आहे. त्‍याअनुषंगाने सोमवार सकाळी 9 वा. या गावात एका विशेष कॅम्‍पचे नियोजन केले. त्‍यात रेशीम उद्योगाच्‍या कामास प्रोत्‍साहनासह नंदवन वृक्ष लागवडीच्‍या अनुषंगानेही माहिती देण्‍यात येणार आहे. या गावात मागल वर्षी जलयुक्‍त शिवार अभियानांतर्गत 8 सिमेंट नाला बांधचे उद्दीष्ट आहे. त्‍यापैकी चार पूर्ण तर 4 प्रगतीपथावर आहेत. गावातील शौचालयाचे शंभर टक्के काम पूर्ण झाले आहे.  
गटविकास अधिकारी एन. पी. घोलप यांनी खुरगाव हे गाव अभियानासाठी निवडून त्‍या गावात अभियान राबविले आहे. तसेच नांदेड तालक्‍यातील सर्व ग्रामपंचायतीमध्‍ये हे अभियान राबविण्‍याकरीता ग्राम संपर्क अधिकारी नियुक्‍त करण्‍यात आले आहे. हे अधिकारी सोमवार 29 मे 2017 रोजी पर्यंत नेमुन दिलेल्‍या ग्रामपंचायतीमध्‍ये अभियान राबविणार आहेत.

0000000